Мордовиянең Азюрка авылында килеп чыккан яулык мәсьәләсенә мөнәсәбәттә җәмгыять, хәтта милләт әллә ничәгә бүленде. Берәүләр мөслимәләрне яклап чыкса, икенчеләр кискен каршы төште, өченчеләр күзлегеннән караганда, яулык урынына калфак кадасак та ярап торачак икән. Кыскасы, дөньяви учреждениеләрдә татар хатын-кызларының баш яулыкларын салдырырга маташу дәвам итә.

Россия һәм Татарстан мөслимәләре берлеге һәм Россия мөселман дизайнерлары берлеге, үзенчәлекле конкурс игълан итеп, проблеманы хәл итүгә үз өлешен кертергә уйлый. Татарстан һәм Россиянең мөселман хатын-кызлары берлеге рәисе Наилә Җиһаншина «Татар-информ» агентлыгына менә ниләр сөйләгән: “Күп вакытта шулай килеп чыга – татарлар да, бүтәннәре дә мөслимә киемен “бу безнеңчә түгел” дип тәнкыйтьлиләр. Ә ничек соң ул безнеңчә? Шуңа күрә безнең дизайнерлар Россия күләмендә күрсәтергә тиешләр: татар, башкорт һәм башка милләт мөселман хатын-кызларының баш киеме тарихта ничек булган һәм бүгенге көндә ничек булырга тиеш – шуны ачыклау өчен бәйге игълан иттек”.