Главная  →  Новости  →  Мөфти хәзрәт: «БЕР КӨЧ БУЛЫП БЕРЛӘШҮ БҮГЕНГЕ ПРОБЛЕМАЛАРНЫ ЧИШӘРГӘ ЯРДӘМ ИТӘ»
Мөфти хәзрәт: «БЕР КӨЧ БУЛЫП БЕРЛӘШҮ БҮГЕНГЕ ПРОБЛЕМАЛАРНЫ ЧИШӘРГӘ ЯРДӘМ ИТӘ»

m%d3%a9fti-chygyshy
17-18 ноябрьдә Казанда «Россия һәм ислам дөньясы: экстремистик хәрәкәтнең глобальләшүенә җавап эзләү» дип аталган халыкара фәнни-гамәли конференция уздырыла. Татарстан мөфтие Камил хәзрәт Сәмигуллин әлеге чараның пленар утырышында катнашты һәм чыгыш ясады. «Ислам – дөнья күләмендә үсешкә ия дин буларак, фән эшлеклеләре, динне йөрәнүчеләр, сәясәтчеләр игътибар үзәгендә. Бүгенге көндә дөньяда 1,5 миллиард мөселман яши, бу — Җир йөзендә яшәүче бар халыкның 23 %ы, — диде мөфти. — Исламның бөтен дөньяга таралуы, шул исәптән Европа берлегенә керүче илләрдә һәм элекеге СССР республикаларында диннең кире кайтуы – болар барысы дин үсешенә кагылышлы сорауларны иң актуаль глобаль сәяси проблемаларның берсенә әйләндерә. Сәясәтчеләр юкка гына кайда масса — шунда сәясәт дип әйтмиләрдер.
Шуны да әйтергә кирәк, дини факторларның тормышыбызга, сәясәткә, халыкара мөнәсәбәтләргә кайтуы, бер яктан, буыннар арасындагы милли-мәдәни бәйләнешне торгызды. Икенче яктан, җәмгыятькә радикаль карашлар таралды, дәүләткә һәм җәмгыятькә каршы күренешләр барлыкка килде. Глобаль куркыныч буларак, ДАИШ ны атарга мөмкин.
Әле 14 гасыр элек үк Ислам кешелек дөньясын берләшергә чакырды. Аллаһка ышану, инану — XXI гасырның котылу юлы, бары тик динебез кешеләрне фәрештәләр дәрәҗәсенә күтәрә ала, мәрхәмәтлелеккә, сабырлыкка, бер-беребезне хөрмәт итәргә, тыныч яшәргә өйрәтә. Бары тик динебез беренче карашка капма-каршы булган әйберләрне берләштерә: дин – фән, дөньяви тормыш — ахирәт, матди – рухи, җан – тән.
Конференция эскстремист хәрәкәтләрнең ни өчен таралуын һәм бүгенге мөселманнарның проблемаларын фәнни-теоретик яктан аңларга ярдәм итәр. Дин әһелләренең, фән эшлеклеләренең, дәүләт органнарының бер көч булып берләшүе бүгенге проблемаларны чишәргә ярдәм итә».
Конференция кысаларында «Якын Көнчыгышта һәм дөньяның башка регионнарында дини радикализм чагылышы», «Россиядә һәм БДБ илләрендә дини экстремизм», «Дини экстремизмга каршы профилактика тәҗрибәсе» һәм башка темаларга секцияләр, түгәрәк өстәлләр уздырыла.
Dumrt.ru